Showing posts with label Mapenzi. Show all posts
Showing posts with label Mapenzi. Show all posts

Tuesday, July 26, 2011

MAPENZI: Mwanamke, ULIPENDEWA NINI?

Katika makala iliyopita, nilijaribu kuelezea tabia moja ya wanaume katika mahusiano ambayo hujitokeza mara nyingi, na wakati mwingine, pande zinazohusika zinakuwa hazielewi ni kwa nini hali kama hiyo huweza kutokea na namna ya kuchukuliana nayo pale inapokuwa imejitokeza.

Kabla sijaendelea pia, napenda kuelezea kuwa makala hizi zinalenga zaidi kutoa “sauti ya wanaume” katika masuala ya mahusiano. By “sauti ya wanaume” simaanishi kwamba mimi ndimi msemaji wa wanaume, bali najaribu kuelezea masuala mbalimbali ya wanaume katika mahusiano, ambayo mara nyingi huwa hayafahamiki au kueleweka vizuri kutokana na sababu mbalimbali.

Katika makala ya leo, nitajikita zaidi katika kujadili KIINI CHA KUPENDWA katika kuimarisha na kudumisha mahusiano. Kwanza kabisa, ni muhimu kufahamu kuwa kila palipo na mapenzi/mahusiano ya kimapenzi kati ya watu wawili huwa kunakuwa na sababu iliyowaleta pamoja hao watu hadi wakaingia katika hayo mahusiano. Kwa upande wa wanaume, baadhi ya sababu za kumpenda na kumchagua msichana huwa ni pamoja na Uzuri wa Sura, Umbile la Mwili, Saizi ya Mwili (mnene/mwembamba), rangi ya ngozi, kimo, upeo wa ufahamu, elimu, dini, kabila n.k. n.k.

Makala hii hailengi katika kuangalia msingi/uhalali wa ‘vigezo’ hivyo kwa undani, bali umuhimu wa ‘vigezo’ hivyo katika kuyadumisha na kuyaendeleza mapenzi hayo.

Kwako mwanamnke unayependwa na mwanamne, moja ya mambo ya muhimu sana kwako kuyaelewa ni sababu ya huyo mwanamme kukupenda wewe. Ni muhimu sana kuelewa ni kitu gani kilichomfanya akawavuka wasichana wengine wote aliokutana nao maishani mwake tangu akiwa mtoto hadi akaamua kukuchagua wewe. Umuhimu wa kuelewa sababu hizo unatokana na umuhimu wa vigezo hivyo katika kuendeleza au kukatisha uhusiano wenu huko mbeleni.

Namna za Kuweza kufahamu

Kuna njia nyingi ambazo unaweza kuzitumia kuweza kuupata ukweli kutoka kwa mwenzako kuhusu sababu za yeye kukupenda. Hakuna njia ambayo ni ya uhakika kuweza kukupatia majibu kamili na unayoyahitaji, hivyo ni muhimu kufaham na kutumia njia mbalimbali. Baadhi ya njia hizo zinaweza kuwa ni kumuuliza moja kwa moja alikupendea nini, wewe kutumia muda kujifunza yeye anapenda nini kwako, kujifunza yeye anapenda nini kwa ujumla na uone kama inahusiana na wewe. Wakati mwingine unaweza kujua yeye anakupendea nini kwa kusikiliza na kuelewa ni vitu gani huwa hawapendei wengine. e.g. Unaweza kumsikia akisema maneno kama: "huwa sipendagi wasichana/wanawake wenye...", hapo unaweza kuelewa jambo...

Kwa bahati mbayai, kwa baadhi ya wanaume, huwa sio rahisi kupata majibu ya swali hilo kwa urahisi, kwa sababu zao nyingi ambazo hutofautiana – SIO WANAUME WOTE WATAKUAMBIA KIRAHISI TU NI KWA NINI ANAKUPENDA WEWE NA SI WENGINE!!!

Kuchumbiwa/Kuolewa Sio Mwisho

Sehemu na ya pili na ya muhimu sana kwako mwanamke, ni kuelewa namna utajitunza na kutunza kile alichokupendea mwenzako. Tambua kwamba, MNAPOKUBALIANA KUWA KATIKA UHUSIANO (uchumba au ndoa) SIO MWISHO WA MCHAKATO WA MAPENZI BALI NDIO MWANZO. Kwa hiyo ni lazima uelewe ni mambo yatakayoendeleza ari na hamasa ya mapenzi miongoni mwenu baada ya hapo. 

Kwa bahati mbaya, Wanawake wengi wanapoingia katika mahusiano, HUSUSAN AKISHAOLEWA huwa anaona kama vile ndio mwisho wa “mchakato wa mapenzi.” Matokeo yake wengi huwa hawajali tena wala kufuatilia ni kitu gani kilimfikisha katika uhusiano! Wengi hujiachia na kujiona ndio 'ameshafika', kumbe safari ndo imeanza!!

Ni lazima uelewe ukipendwa wewe sio kwamba ndio mwisho wa kupenda kwa huyo mwanamme wako, inaweza kuwa AMEAMUA kuacha kupenda tena (na kuishia kwako); LAKINI haimaanishi HANA UWEZO wa kupenda tena! Jifunze na uelewe ni namna gani uamuzi wake wa kupenda unaweza kuishia kwako, na asipate mawazo mengine tena ya kuendelea kupenda “kwingine” akiwa na wewe tayari!

Ni jambo la muhimu sana kuelewa kwamba huyo mwanamme hakukupenda kwa sababu tu wewe ni mwanadamu, amewaona na kuwaacha wanadamu wengi sana kabla yako lakini akakuchagua wewe. Hivyo ni muhimu sana uelewe kilichokutofautisha wewe na hao wengine ni nini, ili uelewe namna gani utaendelea kuwa tofauti na hao wengine siku zote!

Mifano

Kwa bahati nzuri/mbaya sababu za wanaume kuwapenda wanawake ndizo huwa ziko wazi zaidi kuliko kinyume chake. Kwa sababu hiyo tutaangazia baadhi ya sababu ambazo wanaume huzitumia kumchagua mwanamke wa kuishi naye, na namna gani mwanamke akikubali kupendwa anakuwa na wajibu kwa upande wa “kuzitunza” hizo sababu ili huyu mwanmme aendelee kuwa na sababu za kuendelea kumpenda huyu mwanamke.

Baadhi ya vigezo ambavyo wanaume huvitumia katika kuchagua mke ni Uzuri wa Sura, Tabia, Umbile la Mwili, Saizi ya Mwili (mnene/mwembamba), rangi ya ngozi, kimo, upeo wa ufahamu, elimu, dini, kabila n.k. n.k. (kumbuka si lengo la mkala hii kujadili uhalali wa hivi kuwa vigezo vya kumchagulia mtu, hilo huwa ni suala binafsi la mchaguaji). Hapa tutaangalia zaidi nafasi ya vigezo hivi katika kuendeleza uhusiano.

Wanawake wengi sana huwa hawapendi kuambiwa kuwa amependewa saizi ya mwili wake (unene/wembamba) kwa sababu wengi huwa na hofu siku zote kwamba kuna siku anaweza akakonda/akanenepa hivyo mapenzi yakapungua/yakaisha! Hata hivyo, hata kama una hofu, bado hiyo inaweza kuwa ni sababu ya yeyey kukupenda. Kwa mfano, kuna wanaume ambao hata siku moja huwa haoni uzuri wowote wa kumvutia kwa mwanamke mwembamba (kama ma-miss na ma-model) na wengine ni kinyume chake! yote haya ni mapendeleo ya watu binafsi.

Kutunza Kiini cha Mapenzi

Kwa mfano, ukibaini kwamba mume wako alikupenda kwa sababu ya saizi ya mwili wako, inaweza kuwa ni wembamba au unene, ni muhimu sana ukajitahidi kwa kadri ya uwezo wako kutunza umbo lile alilolipenda. Nimependa kuchagua huu mfano kwa sababu ndio huwa unaonekana kuwa mgumu zaidi kwa wanawake walio wengi na hivyo wengi huwa hawapendi kukubali hiki kuwa ni kigezo cha kupendwa!  Wengi husikika wakisema, "akinipendea wembamba je nikinenepa?" USIWE NA HOFU, jambo la muhimu sana hapa kuelewa ni ile jitihada uliyo nayo au utakayoionesha ya “kujitunza” hata kama matokeo yatakuwa tofauti.

Changamoto ya kutunza maumbo ya miili ni kubwa zaidi kwa wakina mama wa mijini ambao maisha wanayoishi (lifestyle) huwa yanahamasisha miili kunenepa, hata kwa vyakula vichache sana (tofauti na wale wa maeneo ya vijijini). Jitahidi kumuonesha mwenzako kwa maneno na vitendo kwamba unapenda ku-maintain umbo alilokupendea, hata kama matokeo yanakuwa tofauti. Unaweza ukaonesha hivyo kwa uchaguzi makini wa vyakula unavyokula, kutokula ovyo-ovyo na kila kitu kianchopita mbele yako, ufanyaji wa mazoezi n.k. Kitu cha muhimu hapa ni kuonesha kwamba unapenda kuwa vile anavyopenda, ila ni kitu kilicho nje ya uwezo.

Kinamama wengi kwa bahati mbaya ‘wakishapendwa’ hujibweteka kwa kuamini kuwa hataniacha, tayari ni wangu, nimefunga naye ndoa kanisani, nina cheti cha ndoa, tayari nina watoto naye, yeye ni kiongozi (e.g wa kanisa au serikali hivyo atakwepa aibu ya kushindwa ndoa yake) n.k. Na kwa bahati mbaya zaidi, ni wanaume wachache sana watakaokuja na kukwambia mke wangu jitunze “hivi-na-vile” ili niendelee kukupenda. Mumeo anatarajia ulishafundishwa hivyo siku nyingi, na mama yako, shangazi zako na kwenye kicheni-pati chako! Hii pia inachangiwa na tabia ya wanaume kutokupendela kuongelea maswala binafsi ya watu, ikiwa ni pamoja na ya kwao wenyewe au watu wao wa karibu!

Kama alikupenda kwa sababu ya Ukimya na Utaratibu wako, jitahidi sana baada ya kuingia katika mahusiano, hususan ndoa, usianze kuwa ‘mapepe’ ETI kwa sababu ‘tayari’ ameshakuweka ndani. Tunza ile amana aliyokupendea ili pendo lake kwako liendelee kudumu.

Kama alikupenda kwa sababu ya upeo wako wa ufahamu aliouona kwako, jitahidi hata utakapo ‘ingia ndani’ usibweteke tu na kuwa ‘mama wa nyumbani’. Endelea kujinoa na kujifua kwenye eneo lako la “strength” ili uendelee kuwa strong ndani yake pia.

Ni muhimu sana kufahamu kwamba wakati mwingine hauwezi kuwa na sifa zote za mwanamke ambaye mumeo anampenda, LAKINI unaweza ukazitunza na kuziboresha zile chache ulizo nazo ili kuhakikisha kuwa unaendelea kuwa ‘tofauti’ na wanawake wengine machoni pa mwenzi wako.

KUMBUKA SIKU ZOTE, kile alichokupendea zaidi mumeo ndicho kinachokutofautisha zaidi na wanawake wengine wote waliobaki, sio pete ya uchumba wala cheti cha ndoa kinachokutofautisha nao KIMAPENZI kwake. Cheti na pete vinaweza kukutofautisha nao kwake KISHERIA lakini mapenzi ni hisia, hayabadilishwi au kushikiliwa na cheti au pete…

Tunza vizuri amana aliyokupendea mwenzio, utaendelea kuwa juu siku zote moyoni mwake! Usijibweteke na kujiamini kwa sababu tayari ‘unaye’, kumbuka haujushika moyo wake! Kama hauamini, ukweli ni kwamba ANAWEZA ASIKUACHE (kwa sababu za kisheria au kijamii), LAKINI AKAISHI NA WEWE AKIWA HAKUPENDI TENA KAMA MWANZO…. Maumivu zaidi yatakuwa kwako...

KWA WANAUME TU: Kama ungependa hii makala mkeo/mchumba aisome hii makala usijali lakini HAUNA NAMNA YA KUMPA, nitumie email yake halafu nita-forwardia ii ujumbe kimtindo.... teh teh teh but am sirias... nibonyezee msbillegeya@hotmail.com au 0716 881 516

Ni mimi mwana-wenyu,
... ustaadhi mussa

Thursday, July 21, 2011

MAPENZI: Wanaume na “Window-Shopping”!

Maisha ya mahusiano ya kimapenzi katika ya wanaume na wanawake huwa yanahusisha mambo mengi sana, mazuri kwa mabaya, yenye kuleta furaha na kuleta huzuni, yeye kujenga na kuvunja moyo na labda mengine ambayo huweza kuwa linajitokeza zaidi ni yenye kuleta maudhi.

Moja ya mambo ambayo huumiza sana wapenzi, na kuleta maudhi sana katikanafsi, ni kuwa na mpenzi wako halafu ukaona au kubaini wakati fulani katika mahusiano yenu kwamba anakuwa interested na mtu mwingine tofauti na wewe.

Mara nyingi sana katika mahusiano ya kimapenzi, wanawake ndio huwa waathirika wakubwa wa matatizo na miendendo isiyo mizuri katika mahusiano. Hii inatokana na sababu nyingi, ambazo sio sehemu ya makala yangu ya leo. Leo, napenda nijadili tatizo moja ambalo huwaumiza wanawake katika mahusiano, nalo ni tatizo la Window-Shopping za waume/wapenzi wao wa kiume.

Katika muktadha huu, window-shopping ni ile tabia ya mwanamme kuwa na mke/mchumba wake lakini bado akaonekana kuwa interested kwa namna moja au nyingine na wasichana/wanawake wengine. Kitendo hiki mara nyingi sana huwaumiza wanawake kwa kuwa mwanamke huanza kuhisi kwamba labda hapendwi, labda ana upungufu, labda anazidiwa mvuto na wengine, labda anaelekea kuachwa, labda mwenziwe amebadilika, labda… labda….. labda…..

Pamoja na sura nyingi zinazoweza kuwa zimejificha katika tabia hii, ambazo baadhi yake zinaweza kuwa hizo zilizokwenye hizo ‘labda’ hapo juu, Napenda kuwasaida kukuelekeza katika upande mwingine wa tabia hiyo miongoni mwa wanaume, ambao unaweza kuwa hauna madhara, au kama unayo, basi yakawa ni madogo sana, iwapo utaelewa. Swali la msingi unalopaswa kujiuliza na kulijibu katika hali kama hiyo ni: ALIKUPENDEA NINI?

Ni muhimu kufahamu kwamba mwanamme anapoamua kumchagua binti kuwa mpenzi/mchumba/mke wake, kwa kawaida huangalia vigezo vingi sana, na akisha vijumlisha hutafuta wastani. Ule wastani atakaoupata ndio humpatia jibu – AKUCHUAGUE WEWE AU ATAFUTE MWINGINE! Hii huwa ni kanuni ya msingi sana kwa mwanamme yeyote aliye-serious na mahusiano. Wanaume ambao humchagua mtu kwa kuangalia sifa moja tu huwa wanakuwa na uwezekano mkubwa wa kubadilisha mawazo wakati wowote kuliko wale wanaochagua kwa vigezo vilivyotafutwa kwa wastani.

Wastani wa tabia huweza, kwa mfano, kujumuisha vitu kama sura, tabia, umbo la mwili, kimo, dini, rangi ya ngozi, kabila/uraia, uongeaji/ukimya, ucheshi/u-seriousness n.k. n.k. n.k. Kweli ni kwamba katika hali ya kawaida, ni vigumu ukawa na sifa zote hizo, au basi ni vigumu kuwa na sifa zote anazozitaka huyo anayekutaka wewe.

Lakini kwa kutumia kanuni ya wastani, mwanamme anaweza akaridhika na wewe na akakutwaa wewe na kuwaacha wengine. Hii haimaanishi kwamba wewe ndiye unazo sifa zote anazozipenda mume wako kuliko wanawake wengine wote – HAPANA! Inawezekana kabisa wakawepo wanawake wenzio ambao wana baadhi ya sifa ambazo mumeo anazipenda na wanakuzidi hata wewe machoni pake, lakini wewe umewazidi kwa wastani na wingi wa sifa anazozitaka.

Kwa mfano, baada ya mumeo kutafuta wastani, alibaini kwamba japo hauna sura nzuri sana au umbo zuri la mwili, lakini una tabia nzuri sana kuwapita wale walio wazuri wa sura kukupita wewe, au wewe ni kabila ambalo yeye analipendelea zaidi, hivyo ukawapiku wale wengine ambao katika hayo maeneo mengine wanaweza kuwa wame-supp.

Utofauti huu unamaanisha kwamba, hata pale mumeo atakapokuona, haimaanishi kwamba wewe ndiwe mzuri kwa sura kuliko wanawake wote duniani, LA HASHA, ila tu ni kwamba wewe ndiwe unafaa kuwa mwenzi wake kwa sababu una sifa nyingi zaidi ambazo yeye anazihitaji maishani mwake kuliko wale wengine ambao wanaweza kuwa na sifa moja wamekuzidi sana lakini nyingine zote hawanazo – HIVYO AKAWAACHA NA KUKUCHAGUA WEWE!

Katika hali kama hiyo, mnapoendelea kuishi, mara moja moja unaweza kujikuta ukibaini kwamba mumeo hupenda kuwaangalia sana wanawake wengine, hususan wale ambao hata wewe unaweza kuona wana tofauti na wewe ambayo wewe hauna – kama uzuri wa sura au maumbile ya mwili – na ukabaini kwamba yawezekana mumeo anavutiwa zaidi na sura/maumbo yao kuliko la kwako. NI KWELI ANAWEZA KUWA ANAVUTIWA NAO LAKINI SIO KIGEZO PEKEE ANACHOKITUMIA KATIKA KUMCHAGUA ANAYEMFAA! Ukiwa na mume wa namna hiyo usiogope, atawaangalia hao wengine lakini mwishoni atakumbuka ni kwa nini alikuchagua wewe – NI KWA SABABU ULIWAZIDI HAO WENGINE WOTE!

Jambo la msingi unalopaswa kulielewa, kuliweka moyoni mwako na kulizingatia NI KUELEWA YEYE ALIKUPENDEA NINI! Ukishaelewa yale yaliyomfanya akavutiwa na wewe na kukuchagua, yashike sana hayo, shika kuyatunza, kuyaenzi na kuyaboresha kila iitwapo leo, ili kila siku aendelee kuamini kwamba hakukuchagua kimakosa.

Usifanye papara ya kutaka kujibadilisha ili ufanane na wale anaowaangalia sana na ukajikuta unayapoteza na kuacha kuyaboresha yale yaliyokupa alama za juu moyoni mwake hadi akakuchagua. Na kibaya zaidi ni kwamba katika kujaribu kujifananisha na wengine unaweza ukapoteza yale mazuri aliyokupendea na pia ukashindwa kuufikia uzuri wa wale unaotaka kujilinganisha nao – ukakosa mwana na maji ya moto.

Kuna mifano mingi sana ya wanawake ambao wamejiharibu sura na maumbo yao ya mwili kwa kutaka kujibadilisha ili wafanane na wale ambao anaona mumewe anawaangalia sana! Woman, Be yourself, onesha kwamba unajitambua na unajiheshimu kwa hivyo ulivyo, mwenzio atakupenda zaidi. Hauwezi kupendwa na kuthaminiwa iwapo utaonesha dalili zozote za kutokujitambua, kutojithamini, kutojiamini na kutojiheshimu kwa hivyo ulivyo.

BINAFSI NIMESHAKUTANA NA WANAWAKE WENGI AMBAO KWA KUMWANGALIA SURA TU HAUWEZI AMINI KAMA KUNA MWANAMUME ANAWEZA KUMUOA (hususan ukilinganisha na wale wanao-“zunguka” barabarani leo)! Lakini ukikaa naye karibu na kuchunguza mwenendo wake, unaweza kubaini ni kwa nini aliweza kuchaguliwa kuwa mwenza wa maisha wa mtu fulani!!!!!!!!!!!!!

hata hivyo, kuwa makini, asije akaangalia hadi akapitiliza huko huko... teh teh teh

Wasaalam,
Mwana wenu,
…mussa