Wednesday, October 12, 2011

MAUAJI IGUNGA: Jinsi wakala wa CHADEMA alivyouliwa na Wanaoaminiwa kuwa CCM!


Taarifa hii imetolewa JAMII FORUMS kwa nia ya kuieneza na iweze kusomwa na watu wengi zaidi - ikiwa ni pamoja na wale ambao labda wasingeweza kuiona. Uwepo wake hapa sio kwa lengo la kuvunja haki-habari ya Jamiiforums au mwandishi kwa namna yoyote ile. Kama kuna usumbufu utajitokeza, tunatanguliza kuomba radhi. Taarifa hii na mjadala wake unapatikana Jamii Forums kupitia http://www.jamiiforums.com/jukwaa-la-siasa/181514-igunga-jinsi-wakala-wa-chadema-alivyouliwa.html

Taarifa rasmi inaeleza kuwa Marehemu Mbwana Masoud, aliekuwa Wakala wa CDM kutokea Ubungo DSM, alipotea tar 2/10/2011, siku ya uchaguzi, lakini ukweli ni kuwa siku hiyo ndiyo ilipogundulika kuwa amepotea baada kuhitajika kupelekwa kituoni kwake na kukosekana. 

Hali halisi ni kuwa Mbwana Masoud usiku wa tar 1/10/2011 (Mkesha wa kuamkia siku ya uchaguzi) baada ya kula chakula cha jioni alitoka kunyoosha miguu, ingawa palitolewa Hali ya tahadhari lakini hali ilionekana iko shwari. Kumbe kulikuwa na kundi la mabaunsa wanne wa CCM wakimfuatilia, na inaelekea walikuwa wakiwasiliana kwa simu na gari lao, kwani mara walipomvamia, tena mbele za watu, gari hilo aina ya L/Cruiser Hardtop jeupe lenye namba T***ARD, mali ya CCM, Mara nyingi katika kipindi cha kampeni hizi lilikuwa likitoka usiku na mchana huwa linapaki, dereva wake ni yule alieshiriki kuwapiga mabapa ya mapanga wana CDM waliokuwa wakidai matokeo ya uchaguzi yatangazwe.
 

Ingawa Mbwana alijitahidi kujitetea asichukuliwe lakini alizidiwa nguvu, alijaribu kupiga kelele kuomba msaada lakini alipigwa kabari ya nguvu, kabla ya watu waliokuwa karibu hawajajua la kufanya (kwani tukio lenyewe lilifanywa kwa kasi, pia walijifanya kama ni watu wanaofahamiana ila wana mzozo fulani) walimtia kwenye gari Hilo na kuondoka nae kwa kasi kuelekea upande wa Mwanzugi.
 

Mafedhuli hao wa CCM, Mateso waliyomtesa Mbwana Masoud kabla ya kumtoa roho ni Mungu na wao wenyewe ndio wanajua, lakini kwa jinsi hali ya maiti yake ilivyokutwa baada ya kutupwa kwenye vichaka karibu na Magereza siku ya tar 9/10/2011 inaonesha dhahiri unyama aliofanyiwa hata huko Somalia walikozoea kuuana hakuna unyama wa aina hii.
 

Alikutwa na suruali tupu bila shati,
SHINGO YAKE ILIKUWA IMEVUNJWA KWA NGUVU, MACHO YAKE YAMETOBOLEWA NA HAYAONEKANI, KICHWA CHAKE KIMEPASULIWA KWA NYUMA CHINI YA KISOGO, KIFUA CHAKE KIMEBABUKA KAMA VILE AMEMWAGIWA AINA FULANI YA TINDIKALI, mwili wake unaonesha alipigwa sana kabla kuuawa kinyama. 

Kilichotushangaza ni kuwa mwili huo uliotupwa hapo unaonesha dhahiri hakuuliwa siku hiyo ya tar 9/10, lakini haukuwa umevimba Kama kawaida bali ulikuwa unaonesha dhahiri kuwa ulitiwa dawa ya kuhifadhia maiti, kwa vyovyote vile wauaji wake hawakuwa majambazi wa kawaida wa mtaani ambao huua na kuishia zao, bali ameuliwa na Organization kamili yenye motive ya kuua wakala wa CDM, ikumbukwe kwamba Serkali ya CCM awali ilitangaza kukataza mawakala kutoka nje ya jimbo, baada Wakili Tundu Lissu kwenda kumfundisha sheria Msimamizi wa Uchaguzi Igunga, ndipo wakaruhusiwa kwa shingo upande, lakini njiani walisumbuliwa sana na maaskari kwa maelekezo ya wakubwa w CCM.
 

Alitekwa ili kuwatisha mawakala wengine waogope kuwajibika, uongozi wa CDM ulitumia busara kutopiga kelele na badala yake kwenda kutoa taarifa Polisi kimyakimya, ingawa Polisi yenyewe haikuchukua hatua yoyote ya msako, mawakala wa CDM waliwajibika vilivyo vituoni na hakuna kura iliyoibiwa, ikabidi Serkali iisaidie CCM ishinde kwa nguvu kwa kuwazuia maelfu ya Vijana waliofika vituoni kupiga kura ingawa walipoteza shahada zao, kwa kujaza form No 17, mwanzo waliwaruhusu kupiga kura Kama sheria inavyotaka, lakini walipoona wanazidi kuwa wengi, ilipofika saa 4 asubuhi Mkurugenzi aliagiza wasiruhusiwe kupiga kura, wakafukuzwa, wengine hawakukuta majina yao kwenye daftari, wengine walikataliwa kupiga kura kwa kuwa waliorodheshwa kuwa wamekufa! Just imagine unaenda kituoni na shahada yako kupiga kura unazuiwa usipige kwa sababu wewe umeshakufa!
 

Haya; pamoja na kutumia vibaya mahindi ya msaada kama rushwa siku moja kabla uchaguzi, na kampeni potofu siku ya uchaguzi kuwa mgombea wa CDM amejitoa kwa hiyo haina haja kumpigia kura, ndiyo yalichangia ushindi kiduchu wa CCM.
 

Nirudi kwenye mada ya msingi ya mauaji, nisameheni najichanganya kwani Nina machungu mengi, Maiti ya Mbwana Masoud ilipookotwa, ilikutwa na kipande cha karatasi ambacho wauaji walitaka iaminike kuwa marehemu aliiandika baada ya kuuawa akitaja majina ya waliomuua, Polisi waliipuuza karatasi hiyo ingawa bado wanaishikilia, inazidi tu kuthibitisha kuwa wauaji wamejaribi kuficha kitendo chao na hivyo kukamilisha misingi ya First Degree Murder!
 

CCM Arusha iliua kwa kutumia Polisi wa serkali yake, lakini Igunga CCM imeua kwa kutumia Mungiki wake iliowalipa na kutumia gari lake, gharama zitokanazo na kodi zetu, Masoud akiwemo.
 

Salaam kwenu enyi Wauaji CCM, mnahubiri Amani na Utulivu majukwaani lakini Mikono yenu imetapakaa Damu ya wasio na Hatia, hakuna waliofanya hivyo wakafanikiwa mafanikio ya kudumu, mmepata Spasmodic Victory lakini Hakika mtaSuffer Eternal, Shameful Defeat!
 

Enyi wauaji CCM, Salaam kwenu kutoka kwa maelfu ya vijana wa Igunga waliodhulumiwa haki Yao ya kupiga kura kwa makusudi, Tunawaambia, Sukilizeni Vizuri enyi Mafedhuli, Haki itatendeka Igunga, however long it might take, lakini HAKI LAZIMA ITATENDEKA TU!
 

Tunajua hamuamini Mungu Enyi Wauaji na Wazinzi wa Wake za Watu, lakini Mungu alishasema " HAKI IKIDHIHIRI, BATILI HUJITENGA, HAKIKA BATILI NDIO HUJITENGA!" Kama mnajidai hamumuamini wala kumuogopa Mungu basi Hakika Mtakumbana na Nguvu za Umma ambazo ni Kubwa kuliko nguvu za Dola!
 

Umma wa Igunga una Hasira na Nyie Mafedhuli wakubwa, mnajua, Mbona hamkusherehekea vilivyo ushindi wenu hapa Igunga? Mlilipua fastafasta mkaenda kusherehekea Singida na Dar ambako mlifanya sherehe kubwa na maandamano ya kumpokea Mbunge wenu wa huko mliekuja kumtengenezea Igunga.

Tuesday, October 11, 2011

"CCM Inaibomoa Tanzania" Beno Malisa

HOTUBA YA BENO MALISA ALIOITOA ARUSHA 


Ndg zangu Wana Arusha,

Awali ya yote ni washukuru kwa Kujitokeza kwa Wingi katika Mkutano huu.

Pia nitumie Mkutano huu kwa niaba ya Jumuiya ya Vijana ya CCM kuwashukuru wananchi wa IGUNGA kwa kukichagua Chama cha Mapinduzi, ingawa Uchaguzi ulikuwa mgumu na changamoto zake lakini tumeshinda, Ushindi si mkubwa bali tumeshinda na sasa tuna fursa ya kutekeleza ahadi tulizotoa 2010/11 ili uchaguzi wa 2015 usiwe na changamoto tulizoziona Igunga.

Natumia Jukwa hili kwa washukuru wajumbe wa Baraza kuu UVCCM walioshiriki katika Uchaguzi wa IGUNGA, Ndg Martin Shigela, Ndg January Makamba, Ndg Hussein Bashe, Ndg Magembe (Mwenyekiti Mwanza) ndugu (M/kiti Kagera) nilifanya nao kazi usiku na Mchana kuleta ushindi huo. Pia namshukuru kwa dhati Katibu Mkuu wa UVCCM ndg Martin Shigela na Ndg Julius Peter katibu wa Mkoa wa Tabora,Pamoja na Ndg Kamoga Mkiti uvccm Mkoa wa Tabora kwa kazi waliofanya wote hawa waliiwakilisha Uvccm Vyema na leo Tumeshinda.

Ndugu zangu, sasa nikiombe Chama wakati wa kuendelea kusherehekea na kujadili Uchaguzi umekwisha; tuisimamie Serikali katika Utekelezaji wa ahadi tulizotoa kwa Watanzania ili uchaguzi mkuu ujao tusiwe na kazi kubwa.

Ndugu zangu, leo Taifa linakabiliwa na changamoto kubwa na changamoto inayotukabili ni pale ambapo viongozi wanatoa kauli RAHISI katika mambo mazito ya Taifa hili, nimesoma katika mitandao kuna kiongozi mkubwa wa Chama amesema ETI TANZANIA ni ya CCM. Jamani, Tanzania ni ya watanzania wote si ya CCM peke yake; tuache kauli hizi za kejeli na kifedhuli zitavuruga umoja wetu na Mshikamano tulionao ambao umejengwa kwa misingi imara ya kuheshimiana na kushirikiana.

Tusiwagawe watu kwa ITIKADI za Vyama sote tumepanda magari kuifikia Tanzania NJEMA; ama Ni sawa na Wakulima wanaolima shamba moja ambao kila Mmoja ameshika jembe lake analoliamini nia yetu sote ni kujenga nchi hii tusiwabeze ambao si Wana CCM.

Ndg wana Arusha sasa Niongee na Nyinyi uchaguzi umekwisha Tujenge Arusha yetu na Nitumie nafasi hii kuziomba Pande Zinazosigana kumaliza mgogoro ili Manispaa itulie watu wafanye kazi siku ya Mwisho tutawaumiza wananchi kwa tofauti zetu za vyama na kugombea Madaraka. Nimesikia kuna madiwani wamefukuzwa Chadema na kuna Viongozi ambao si wana chadema wanawakingia Vifua niwaombe tusiingilie mambo ya Vyama vyao na tusitumie nafasi tulizopewa na dhamana hizi kuingilia yasiyotuhusu niwatake vijana wa CCM kisheria kata hizo zitaenda katika uchaguzi jiandaeni kugombea.

Sisi kama Chama kinachoongoza, tujitahidi kuheshimu demokrasia na maamuzi ya vyama vingine tusipende kutumia Vyombo vya serikali kuwakomoa kwani siku ya mwisho wanaoumia ni wananchi na si Vyama vya siasa.

Nitumie nafasi hii kumuomba Mbunge wa Arusha Mjini kaka yangu Lema kuwa mstari wa Mbele katika kuleta Umoja na Mshikamano hapa Mjini na kumaliza tofauti za uCCMna uCHADEMA ili wakazi wa Arusha wapate maendeleo.

Ndugu zangu vijana wa CCM, mwakani ni mwaka wa Uchaguzi jitokezeni mgombee kwani zaidi ya asilimia 60 ya wakazi wa nchi hii ni sisi lazima tugombee tusiwe wapiga debe tuingie katika nafasi za maamuzi ili kujadili maslahi ya vijana kwani tusiposhiriki katika maamuzi hayo maslahi yetu kama vijana yataendelea kusahaulika na sisi kuwa nyuma kimaendeleo.

Niitake serikali yetu ya CCM kutambuwa kuwa muda wa kukaa likizo hakuna lazima kufikia matarajio ya watanzania; leo Sukari bei juu, leo mafuta bei juu, leo dola inakaribia 1,700, haya yote yanaathiri maisha ya watanzania lazima tusimamie uzalishaji wa ndani na masoko ya uhakika ili kupunguza ugumu wa maisha na kupunguza kupanda kwa bei za bidhaa leo tunaagiza sukari wakati hatuna uwezo wa kudhibiti shilingi tunatarajia nini? Tunatumia Polisi kuzuia wafanyabiashara kuvusha sukari tunasahau kuwa bei ndio kikwazo serikali itengeneze mfumo wa kuvipa Viwanda vya ndani ruzuku ili bei ishuke ya sukari viwandani wafanya biashara wapate faida nzuri. Ama serikali itafute mfumo utakaodhibiti upelekeji nje sukari kutaifisha kutatuletea matatizo. Hatuwezi kudhibiti tu bila kutafuta njia ya kupungiza makali kwa wafanya biashara, Mchele leo ni 1,500, sembe 1,000 serikali itafute majawabu na si majibu rahisi juu ya haya mambo.

Ndugu zangu, CCM inapitia wakati mgumu; badala ya kuisimamia serikali tunahangaikia kutafuta wachawi na kutuhumu watu! Tuache kabisa hili jambo halikisaidii chama wala Taifa letu kumekuwa na dhana na Fikra Potofu juu ya Ushindi wetu wa 2010; matokeo yale na tuliyoyaona Igunga ni funzo kuwa watu (na hasa Vijana wengi) wameanza kutokuwa na imani na CCM kwasababu tunashindwa kuwaonyesha kuwa tuna majibu ya matatizo yao tumebaki tunaimba historia na kumtaja Baba wa Taifa na kutumia nukuu zake bila kuwapa matumaini vijana kuwa Tanzania yao itakuwa njema watapata Elimu nzuri, Afya itakuwa ya uhakika, Uchumi utakuwa imara, Ajira zitapataikana, Fursa za kujiajiri zipo, Mikopo inapatikana tusipotoa matumaini haya na kuyafikia 2015 wapiga kura milioni sita (6) wapya watatukataa uelewa wa vijana wa Kitanzania sasa umekua mkubwa wanajua haki na wajibu wao tuache kufanyia siasa maisha ya Watanzania.

CCM tunalalamika wakati sisi wenyewe tunaibomoa nchi na chama chetu. Tazama sakata la DOWANS, waliosema wao watatusaidia kupinga kulipa DOWANS na ambao walitushauri na kutumia nafasi zao tusinunue mitambo ya Dowans nao sasa wanalalamika na kuanza Kutafuta wachawi wawajibike walitudanganya kama taifa leo tumeshindwa kesi MITAMBO ileile waliyosema haifai leo inatumika na kampuni ya Symbion wanatufanya watanzania mazuzu. Walisema heri tukae gizani wakati wao wanatumia majenereta na wanalipiwa na serikali huku wakinunua aspirini kwa mamilioni leo wanajifanya wazelendo! Nilitarajia wawajibike walidanganya TAIFA serikali ikavunja Mkataba. Wakasema MITAMBO haifai mibovu leo imenunuliwa na wamarekani na wanatuuzia umeme hawa watu wanafiki wametufikisha hapa. Niwaombe UVCCM na Vijana wa Vyama vyote tuungane hawa wawajibike.

Niwaombe UVCCM wenzangu, chama hiki ni chetu sote si mali ya mtu wala watu ni mali ya wanachama tusikubali kikundi kujipa utakatifu kuwa wao ndo wema na wana uchungu hawa tuwaogope kama Ukoma. 

Kuna watu wanatumia madaraka waliyopewa wazazi wao kuivuruga JUMUIYA, niwaonye wasirudie uhuni waliotaka kuufanya hapa jana na JUZI wasirudie tutawafukuza ktk jumuiya bila kujali wao ni watoto wa nani. 

CCM na UVCCM ni yetu sote haina mtu anaejiona yeye ni 'Boss' sisi wengine ni watwana, nampongeza katibu mkuu kumuondoa katibu wa mjini hapa Arusha lilitokea lisirudie tena, na hii tabia ya watu kujifanya wao wanatoa maelekezo eti haya maelekezo Msisite kuhoji nani katoa maelekezo kwa maslahi yapi msitishwe vijana wenzangu msiishi kwa kutarajia madaraka ya kupewa. Wapo wengine wanapita wanakusanya CV za vijana na kuwaahidi vyeo vya U DC! Msipotoshwe na wala msifungwe Fikra kwa sababu mmepewa ahadi ya kuteuliwa U DC. Tuna bahati mbaya wapo ambao mpaka leo wanaishi kwa kusubiri U DC wamegeuka 'NDIYO mzee' na watumwa FIKRA; tuukatae utumwa huu UVCCM, tusiwe 'ndiyo mzee'. 

Nawaagiza wenyeviti na makatibu wa mikoa na wilaya zote Tanzania wafatilie katika Halamshauri zao kujua Mipango ya maendeleo inayohusu vijana na kufatilia utekelezaji wake; wakiona hakuna utekelezaji watumie kamati za siasa za wilaya kuwabana wenyeviti wa Halmshauri. Nazitaka wilaya zote zifatilie zituletee taarifa juu hili jambo. Tusikubali kuwa NDIO mzee lazima tusimamie maslahi ya Vijana.

Nitumie hapa mwisho kuwaomba Vijana wenzengu tusigawanyike kwa maslahi ya Kisiasa na Vyama mambo yanayohusu Vijana. Tuungane na hapa Arusha msikubali tena kurudia yaliyotokea Mwezi Februari kugawanywa kwa maslahi ya vyama na kuumizana, uchaguzi umekwisha tujenge Arusha yetu.

Mwisho niwape POLE nyote mliotishwa katika kutekeleza majukumu ya Chama chetu; niwape Moyo Msiogope. Tuko Pamoja, UVCCM si mali ya mtu na wala asitokee ambaye anadhani ana mamlaka! Mimi ndio KAIMU MWENYEKITI WENU hakuna mwingine. Anayetuvuruga mnamfahamu, asitulazimishe tumvunjie heshima.



KIDUMU CHAMA CHA MAPINDUZI

Monday, October 10, 2011

IGUNGA: Kitaalam CHADEMA Ilishinda!

Katika mojawapo ya makala zangu zilizotangulia nilijaribu kuelezea ni kwa namna Wasomi ndani ya CCM hawakisaidii Chama kwa Namna inavyotakiwa na kutarajiwa. Nilielezea ni kwa namna gani wasomi waliomo ndani ya CCM nao wametekwa na kuingizwa kwenye mfumo wa Siasa Uchwara, Majitaka na ushabiki wa Kisiasa badala ya kuwa Viongozi wa Kisiasa. 
Matokeo ya Idadi: CCM Ilishinda!

Matokeo yake ni kwamba maneno na matendo mengi ya CCM kwa leo huonekana kama yameamuliwa kwenye vikao ni mikutano ya mashabiki na sio wasomi, weledi na watu wenye uelewa wa kile wananchokifanya. Ushabiki huu unapopitiliza hupoteza nafasi ya usomi na ueledi. Leo Natafakari "kitaalam" matokeo ya Uchaguzi wa Igunga.

Matokeo ya Igunga yalipotangazwa, ilikuwa ni shangwe na Nderemo kwa wana CCM – nadhani wote! Hii ikiwa ni pamoja na viongozi, wasomi na mashabiki wote wa chama. Wachache ndani ya CCM tulikaa na kutaathimini maana ya huu ushindi kwetu kama chama. Ninapozungumzia taathimini ya kitaalamu, namaanisha sio kuangalia matokeo yaliyotangazwa na msimamizi wa uchaguzi – bali matokeo hayo yamepatikanaje, tuliowashinda walipata nini, na iwapo mbegu yetu inaota na itazaa matunda baadaye au ya wapinzani ndiyo ina uwezekano wa kuzaa matunda baadaye?

Wana CCM wengi tulishangilia sana ushindi huu, na wengine tukaenda mbali kukebehi “alama” ambayo CHADEMA wameiweka Igunga. Wachache sana miongoni mwetu waliangalia kwa karibu maana ya matokeo haya na wachache wakaipongeza CHADEMA “kwa kujitahidi”.

Kitaalam, katika uchambuzi huwa tunazingatia mambo mengi sana ili kuelewa “mshindi” wa kweli kwenye uchaguzi. 

Kwanza, tunapima fursa: Ni nani alikuwa na fursa nyingi kuliko mwingine? E.g. CCM lile jimbo lilikuwa ni la kwetu tokeapo, kwa hiyo tulikuwa tunatetea ubingwa. Tofauti na CHADEMA ambao hawajawahi kushinda Ubunge Igunga – hata mara moja.

Pili, CCM tulishagombea mara nyingi kwenye hilo jimbo, tofauti na CHADEMA ambao hawajawahi kusimamisha mgombea kwenye hilo jimbo hata mara moja! Hii inamaanisha kwamba wananchi walishasikia na kupima hoja na ilani zetu za CCM mara nyingi wakati walikuwa hawajawahi kusikia wala kupima sera za CHADEMA katika nafasi ya Ubunge – HATA MARA MOJA!
CHADEMA 'wameivamia" Igunga kwa Mara ya Kwanza na Kupata 44%
ya Kura, CCM Imekaa miaka 34 ikapata 46%. Awamu Ijayo Hali inaweza ikawaje??

Tatu, Mkuu wa Wilaya ambaye ndiye “Rais” wa wilaya, japo wananchi wengi hudhani kwamba ni mtumishi wa umma tu na kwamba anatumikia wananchi wote “bila ubaguzi wala upendeleo”, kivitendo NI LAZIMA awe mjumbe wa kamati ya Siasa ya Wilaya – kwa hiyo anakisaidia Chama – akiwa katika nafasi ya Umma – CHADEMA HAWANA DC WAO!

 Hii ni pamoja na vyombo vingine “vya umma” ambavyo hata hivyo hufanya kazi chini ya serikali ya CCM na kwa kutekeleza ilani ya CCM kama Polisi, Msimamizi wa Uchaguzi Jimboni n.k. n.k.!

Nne, Chama cha Mapinduzi kimekaa madarakani Igunga na Tanzania kwa ujumla tangu siku kilipozaliwa – miaka 35 hivi iliyopita. Ninamaanisha CCM imekuwa na nafasi ya kutumia fedha za Chama na Za Serikali kwa ajili ya Kueneza Propaganda za Chama, Kujitangaza na kutekeleza Ilani yake hapa Nchini – na Igunga – kwa zaidi ya miaka 34 mfululizo. Hii inamaanisha kuwa serikali ya CCM imekuwa na nafasi ya kuwafanyia mambo yote mazuri ambayo wanayahitaji wana Igunga kwa Miaka 34 MFULULIZO. 

Muda huu, iwapo chama kimeutumia izuri, unatosha sana chama kutokupiga kampeni na kutoa ahadi yoyote mpya – maana wananchi tayari wanakuwa na picha halisi ya chama, utendaji na utekelezaji wa ilani zake. Na katika hali ya kawaida, ni rahisi hata wananchi wenyewe wakasema hawataki kusikia ilani wala ahadi za mtu mwingine yeyote maana wametosheka na huyo waliye naye!

Tano, CCM tuliingia kwenye Uchaguzi huu tayari tukiwa na kura 35,000 tulizozipata miezi michache tu iliyopita – hata mwaka haujaisha! CHADEMA wameingia wakiwa na Kura Ziro/Sifuri/0/NIL!

Kwa upande wa CHADEMA, hakikuwa na hata mojawapo ya Sifa na Fursa hizo zilizotajwa na ambazo hazikutajwa hapo juu! CHADEMA, kwa namna hiyo, kilitegemea zaidi mbinu nyingine mbadala, kubwa ikiwa ni kutumia rekodi yake fupi ya utendaji na umahiri wake bungeni, ilani yake mpya kwa wana Igunga na hamasa tu ya kutaka kuwafikia wananchi wengi iwezekanavyo – hata kule ambako chama hakina mizizi wala historia ya muda.

Matokeo ya Kwenye Karatasi!
Matokeo ya kwenye karatasi yalipotoka – CCM 46% Chadema 44%!.... Swali unaloweza kujiuliza kwa haraka kabisa – NI NANI ALIYESHINDA KATI YA HAO WAWILI…? Ukirudi kwenye utangulizi wangu ambao unashauri tuwe tunayaangalia mambo kwa umakini – unaweza kuwa na jibu tofauti kabisa na ambalo atakuwa nalo “shabiki” akiyaangalia matokeo hayo!

Ukichukua orodha ya fursa ambazo CCM iliingia nazo kwenye Uchaguzi, ukalinganisha na Fursa za CHADEMA utabaini kuwa hadi kipenga cha kampeni kinapulizwa – matokeo yalikuwa ni CCM – 100% CHADEMA 0%. 

CCM tuliingia kwenye Uchaguzi huu tayari tukiwa na kura 35,000 tulizozipata miezi michache tu iliyopita – hata mwaka haujaisha! CHADEMA wameingia wakiwa na Kura Ziro/Sifuri/0/NIL! 

Siku Chache tu za Kampeni ziliporomosha Historia ya miaka 34 ya CCM Igunga kutoka 100% dhidi ya CHADEMA hadi 46% - 2% ZAIDI YA CHADEMA iliyopata 44%! – NI NANI MSHINDI HAPO!

Nasisitiza Utaalam na Ueledi
Ni kweli kwamba watanzania wote tunahitaji maendeleo – bila kujali vyama vyetu, dini zetu au makabila yetu. Lakini wito wangu siku zote huwa ni kuwakumbusha na kuwataka watanzania kutambua na kukubali kwamba maendeleo ya taifa hili, kama ilivyo kwa mataifa mengine, hayatakuja kutokana na USHABIKI wa vyama – bali matumizi ya utaalamu katika kuchambua, kutaathimini mambo na kuweka mipango na kuitekeleza KITAALAMU!

Ushabiki hautaisaidia hii nchi WALA VYAMA VYETU. Naamini watanzania wote tukiweka mbele utaalamu na ueledi katika msuala yote tunayoyapanga na kuyafanya – ndani ya chama na serikali – tutaweza kuvisaidia sana vyama vyetu na taifa letu kupita tunavyofanya wengi wetu kwa sasa – KUPIGA PROPAGANDA ZA USHABIKI…!

Wasaalam…… //mussa

Friday, October 7, 2011

CCM Kukataliwa Mijini!

Kama nilivyoahidi katika makala yangu iliyotangulia - unaweza kuisoma kwa kubonyeza hapa http://msbillegeya.blogspot.com/2011/10/ccm-na-ushindi-wa-vijijini.html, katika tafakari yangu ya leo naangalia kukataliwa kwa CCM mijini kuna maana gani.
Mikutano ya CCM Maeneo ya Mjini imepoteza mvuto sana,
na wakati mwingine huhudhuriwa zaidi na watoto.
Katika miji ya Tanzania, kama ilivyo mijini mingine mingi duniani, ndiko kuna idadi kubwa ya watu ambao ni muhimu na tegemeo sana kwa taifa. Shule na Vyuo vya Elimu ya Juu, Wataalam, Wanazuoni, Wanauchumi, Wachambuzi na Washauri, Vyombo vya Habari, Wafanyabiashara, Wageni wa Kidiplomasia, Weledi n.k. n.k. n.k

Kwa upande wa pili vijiji vya Tanzania ndiko kunakaa jamii kubwa ya watu wasiojua kusoma wala kuandika, watu wasio wahi kuona hata gazeti moja maishani mwao, watu ambao hawajawahi kusikia matangazo ya kituo chochote cha radio cha kitaifa, watu ambao wengine HAWAJUI HATA KAMA KUNA KIFAA KINAITWA TV achilia mbali kuwa na simu ya mkononi – na kwa leo tusitaje Intanet.

Chama cha Mapinduzi katika chaguzi mbili mfululizo kimeonesha kusaidiwa na kutegemea sana ushindi unaotokana na kura za maeneo ya vijijini. Hii imetokana kwa kiasi kikubwa sana na CCM kupoteza umaarufu na kukubalika  kwake miongoni mwa jamii ya watu ufahamu, maarifa, hekima elimu na ushawishi.

CCM imepoteza kukubalika na umaarufu wake kwa kiasi kikubwa sana kutokana na kushindwa kujibu maswali na changamoto nyingi zinazowakabili wananchi – miaka 34 baada ya kuzaliwa kwake.
Ukubalifu wa CHADEMA mijini ni tishio la wazi kwa CCM!

Mbaya zaidi, jamii hii ya watu walioko mijini wanavyo vyanzo vingi sana vya habari na taarifa ambavyo kwa kiasi kikubwa vinawasaidia kuelewa kuewa matatizo waliyonayo katika maisha yao ya kila siku yanaweza  kutatulika – tena mengine kwa muda mfupi kabisa – japo CCM na serikali “zake” hakioneshi dalili ya kuwa na uwezo – wakati mwingine hata nia – ya kutatua matatizo na kuboresha maisha ya wananchi.

Uwepo wa vyombo vingi vya habari na vyanzo vingi vya habari kumewawezesha wananchi wengi wa mijini kubaini kwamba matatizo yanayowakabili yanatatulika. Wengi wanashuhudia kila siku kwenye televisheni, intaneti na magazeti kuwa jamii na mataifa mengi Serikali zao zimekwisha kutatua matatizo mengi ya wananchi ambayo na Tanzania yapo lakini kwa upande wa CCM na Tanzania maelezo yake mengi yamekuwa ni ya kuonesha ugumu na changamoto ya kufanya kazi na wakati mwingi kukwepa kuzungumzia masuala ya msingi ambayo wananchi wanataka kupataiwa majibu yake.
Wana vijiji huupenda sana "unyenyekevu" wa CCM
Pasipo kutumia maelezo mengi wala kuzunguka sana – maneno na matendo mengi ya Serikali ya CCM – HUSUSAN CHINI YA KIKWETE – yanaweza kuelezewa kuwa si kitu kingine zaidi ya  UBABAISHAJI! Ni ubabaishaji huu ambao umewafanya watu wengi wa mijini kukikataa Chama cha Mapinduzi ambacho walijitahidi na kujilazimisha kukiamini, kukitetea na kukisifu kwa miaka mingi – HADI WALIPOCHOKA KWA KUTOONA MATOKEO YA “SUPPORT” YAO KWA CHAMA!

Wakazi wengi wa mijini, na ambao wengine miongoni mwao wamekuwa wakupata nafasi ya kutembelea nchi nyingine duniani, wamechoka kuona nchi nyingine zilizowahi kuwa sawa na Tanzania kimaendeleo zikipiga hatua kubwa za kimaendeleo wakati Tanzania tukiendelea kupeana ahadi na msisitizo ukiwekwa kwenye kukisifu chama kwa “kuleta” amani na utulivu – japo umaskini na shida pia zimezidi kuongezeka chini ya Utawala wa chama hiki hiki!

Maandishi Ukutani

Katika dunia ya leo – kisiasa – kukataliwa na wasomi, watu weledi, wataalamu, wafanyabiashara na wanaharakati, ni “maandishi ukutani”! Unachohitaji ni kutafuta “nabii” wa kukusomea na kukutafsiria maana ya maandishi hayo ukutani. CCM inahitajika kutafuta nabii wa kukisaidia kusoma na kutafasiri maandishi haya ukutani.

Niko Tayari Kuisaidia CCM

Nikiwa Mtanzania, Mwanasiasa kwa Taaluma na kwa Utendaji, niko tayari kukisaidia Chama cha Mapinduzi – kufanya jambo moja tu – KUKISOMEA NA KUKITAFSIRIA MAANDISHI YA UKUTANI! Hata hivyo ni muhimu kuelewa kuwa kusomewa na kutafsriwa haitoshi kukisaidia Chama. Kunahitajika kuwe na Mfalme na Wasaidizi wake ambao watakuwa na uwezo na utayari wa kufanya maamuzi na vitendo sahihi ili kurekebisha hali!

CCM ya Kikwete Haisadiki, hata hivyo

Kwa bahati mbaya CCM KWA SASA HAINA KIONGOZI WA UONGOZI UNAOWEZA KUISAIDIA kukabili haya mapinduzi ambayo tayari yalishaanza na yatakikumba chama na kukiondoa kutoka madarakani hivi karibuni… 

CCM inayoongozwa na Kikwete imejawa na inaongozwa na kikund au vikundi vya mashabiki NA SIO VIONGOZI! Kikwete amejizungushia na amezungukwa na MASHABIKI wake badala ya WASAIDIZI wake! Namaanisha wazi kuwa ANGUKO LA CCM KUTOKA MADARAKANI TANZANIA HALIKO MBALI.

Wasaalam…… //mussa

Thursday, October 6, 2011

CCM Na Ushindi wa Vijijini!

Kama ilivyokuwa mwaka jana mwanzoni mwa Novemba, kitimtim cha Uchaguzi kimetulia, zamu hii ilikuwa ni Igunga! Jambo lingine muhimu sana katika kusoma na kuelewa mwenendo wa upepo wa kisiasa, ambalo lilijitokeza sana kwenye Uchaguzi wa mwaka jana limejitokeza tena – Ushindi wa CCM umetegemea kwa kiasi kikubwa sana “Kura za Vijijini!”.

Tuvichambue Vijiji

Katika nchi karibu zote duniani (ukiacha nchi chache zilizoendelea), vijiji au wanavijiji huwa na hueleweka kuwa ni wenye sifa kuu zifuatazo:

  •           Wasiosoma (sana)
  •           Wasio na Ufahamu wa mambo mengi yanayoendelea katika dunia ya sasa (current/contemporary issues)
  •           Wenye upeo mdogo wa kifikra na kiufahamu
  •           Maskini
  •           Walio nyuma kisayansi na kiteknolojia
  •           Wasio na Ufahamu mkubwa wa masuala ya kitaifa (achilia mbali kimataifa)
  •          Wagumu na wazito wa kupokea mabadiliko
  •          Wanaodharauliwa au kutengewa na jamii nyingine (hususan za mijini)
  •           Wanaojidharau wenyewe
  •           Wasio na elimu ya Uraia – haki na wajibu wao

Sifa hizi nyingi – labda sio zote – pia zinafanana na wanavijiji wa Tanzania.
Mazingira wanayosomea Watoto wa Vijijini ambao baadaye huja kuwa
Wapiga kura Huathiri Sana Uwezo wao wa kuelewa na kupambanua
bado hata wakiwa watu wazima

Wanavijiji vya Tanzania

Wana vijiji wengi wa Tanzania wanakaa katika vijiji ambavyo vilianzishwa na baba wa taifa vikijulikana kama vijiji vya ujamaa. Kutokana na sababu mbalimbali, watanzania wengi wanaokaa vijijini bado wanakabiliwa na changamoto nyingi ambazo zinawafanya wawe ni watu wenye elimu ndogo zaidi (ikilinganishwa na wale wa mijini), ni watu wasiopata taarifa nyingi za kila siku na mabadiliko ya taifa na dunia kwa ujumla kutokana na kutokuwa na vyanzo vingi vya habari kama Radio, Televisheni, Magazeti na Intaneti kama wa mjini.

Wananchi wengi wa vijijini Tanzania pia wanakabiliwa na changamoto ya kuwa na ufahamu mdogo sana wa uraia – haki na wajibu wao. Hii inachangiwa sana na mfumo wa elimu ambao hauweki msisitizo kwenye elimu ya uraia. 
Wanafunzi wa Mijini Wana mazingira mazuri zaidi ya kusomea ambayo
 huwasaidia kuwa na mtazamo mzuri zaidi, upeo na ufahamu wa kuwasaidia
kupamabanua mambo kuliko wa vijijini

Hii inamaanisha kuwa elimu ya uraia imebaki kwa kiasi kikubwa sana kuwa ni jukumu la wananchi wenyewe na liko mikononi mwa wananchi wenyewe kuelimishana wao kwa wao. 

Wingi, ukaribu na elimu walizonazo wakazi wa mjini vinawasaidia sana wakazi wa mijini kuamshana na kuelimishana wao kwao pasipo kuhitaji jitihada zozote za serikali – hali haiku hivi vijijini.

Ukosefu huu wa taarifa na maarifa unamaanisha watanzania wengi walioko vijijini wako nyuma kielimu, kiufahamu, kimaarifa na uwezo wak upambanua mambo. Ukosefu wa taarifa na maarifa haya muhimu ya kila siku unamaanisha kifikra na kimtazamo katika mambo mengi wananchi hawa wa vijijini wako nyuma sana pia.

Kuwa nyuma kitaarifa, kifikra na kimtazamo inamaanisha kuwa wananchi hawa wanaweza kudanganywa na kuhadaiwa kiurahisi, wanaweza kutishwa au kurubuniwa kiurahisi na kwa ujumla wao wenyewe wanaokuwa hawana uwepesi wa kupokea mabadiliko yoyote katika jamii na maisha yao.
Kwa wananchi Maskini, wenye elimu na uelewa mdogo wa siasa, uraia
na maendeleo, WALI MCHUZI unatosha sana kuwafanya wakampatia Mgombea Kura.

Wana Vijiji wengi wa Tanzania wanajua tuliko toka – Mkoloni, TANU, Ujamaa na hatimaye CCM ya Nyerere na Mwinyi kidogo. Wanachi wengi wa Vijijini hawajui tulipo sasa, mahali CCM ilipotufikisha, achilia mbali tunakoenda!

Siku wananchi hawa wakifanikiwa tu kufahamu TUKO WAPI kwa sasa na wakaelewa "realistically" TULIPASWA KUWA WAPI, hatima ya CCM itakuwa imefika!

Mifano halisi

Kuna wanavijiji wengi hadi leo hapa Tanzania ambao wanaamini Rais wa Tanzania ni Nyerere. Kwao, uchaguzi ukija, inatosha sana kuwaambia wachague chama cha Nyerere wakakichagua bila kuhitaji kusikiliza sera, kampeni, ahadi wala taarifa zozote za utekelezaji wa ilani zilizotangulia.

Ikitokea mpinzani akaenda “kuwadanganya” kwamba Nyerere amekufa, inatosha sana kuwaambia kuwa Nyerere amemweka “mtoto wake” agombee kwenye nafasi yake na wao wakamchagua “mtoto wa Nyerere”.

Mkoani Kagera, hususan wilaya ya Ngara, mwaka 1995 wakati wa uchaguzi wa kwanza wa Vyama vingi, wananchi wengi vijijini waliambiwa kuwa wakichagua “rais wa upinzani” atauawa na Jeshi ambalo ni la Chama cha Mapinduzi na kisha vita na mauaji ya wenyewe kwa wenyewe itaanza! 

Taarifa hii ilikuwa inatosha sana kuwafanya wananchi waichague CCM na kuvikimbia vyama vya Upinzani kama ukoma. Sababu ilikuwa ni moja kuu: kumbukumbu ya mauaji ya kikatili yaliyofanyika Burundi baada ya Mgombea wa Upinzani, Melchior Ndadaye, kushinda uchaguzi na kuuawa na jeshi la serikali ilikuwa bado mbichi sana katika macho, fikra na mioyo yao!

Taarifa za uvumi na uongo wa namna hii umekuwa ukitumika katika maeneo mengi sana hapa nchini – mara nyingi kwa ajili ya kukisaidia chama changu cha Mapinduzi - CCM! Kwa wote wanaotokea vijijini, tukipewa nafasi ya kutoa maoni, shuhuda nyingi sana za matukio ya namna hii yataelezwa hapa mtandaoni.

CCM Kukataliwa Mijini

Chaguzi za mwaka jana na mwaka huu zimezidi kuonesha kuwa Chama cha Mapinduzi kinazidi kukataliwa kila kukicha katika maeneo ya mijini hapa Tanzania. Kwa hali ya miji ya Tanzania, inamaanisha CCM inazidi kukataliwa na raia makini, wasomi, wasomi watarajiwa, wataalamu, weledi, wanazuoni, wachambuzi, wanaharakati, wafanyabiashara n.k.

Cha ajabu ni kwamba makundi haya ndiyo muhimu sana katika kuliendesha taifa lolote duniani! Dar es Salaam, Arusha, Mwanza, Mbeya, Iringa na miji mingine mingi, CCM imeonekana kutokubaliwa kabisa – kwingi imeshindwa na hata pale iliposhinda ilikuwa ni jasho jingi – na “labda” hata kwa “mikakati mingine”!
Wananchi wa Mijini kwa kiasi kikubwa sana huelewa na  kuunga
mkono Sera na harakati za CHADEMA kuliko CCM. Pichani ni
Wananchi wa Igunga "Wakienda Sawa" na Mwenyekiti wa CHADEMA,
Mbowe, F.A

Katika uchaguzi mdogo wa Igunga, wanachama na mashabiki wengi wa CHADEMA walianza kushangilia ushindi mapema baada ya matokeo ya vituo vya mjini kutoka – walisahau kwamba ushindi wa CCM hutoka vijijini! Yalipotoka ya Vijijini – kilichofuata sote tunafahamu!

Mwanzo wa Mwisho wa CCM?

Victor Yanukovic, Rais wa Ukraine alipinduliwa na wananchi mwanzoni mwa miaka ya 2000 baada ya kushinda uchaguzi kwa kupata kura nyingi za vijijini lakini wananchi katika miji yote wakagoma na kuandamana kutoka aondoke kwa tuhuma za wizi wa kura. 

Wananchi wa vijijini hawakumsaidia Yanukovic maana walikuwa hawajui hata kinachoendelea – zaidi ya yote kwamba hawakuwa na sauti ya kuwawezesha kusikilizwa. Victor Yanukovic alipinduliwa na kuondoka, Victor Yushenko aliingia Ikulu nak uongoza Nchi.

Tukiacha ushabiki na maelezo ya kujifariji, kitendo cha chama kukataliwa mijini ambako ndiko watu wana uelewa na ufahamu zaidi na badala kutegemea ushindi unaotoka kwa watu wasio na uelewa na upeo wa maamuzi wanayoyafanya ni wazi kuwa mwisho wa chama unakuwa umekaribia – TENA UMEKARIBIA SANA.
Mikutano ya CCM ambayo kwa miaka mingi ilikuwa inavutia
sana Wananchi, Siku Hizi Imeanza KUVUTIA ZAIDI WATOTO,
kama inavyoonekana hapo pichani. Mchambuzi mmoja alisema
watoto hawa hufuata muziki, kama wanacyofuata helkopta
kwenye mikutano ya CHADEMA!

CCM tuendelee kujifariji tu kwa sasa, lakini ukweli ni kwamba mwisho wa chama chetu umekaribia mno – KAMA SIO KWAMBA UMESHAFIKA. Hatua madhubuti sana zinahitajika ili kurudisha imani ya wananchi, wasomi na wenye uelewa watuunge mkono kama chama kuliko kuendelea kujisifia na kujifariji kwa kura za vijijini. 

KWA BAHATI MBAYA SANA – KWA SASA CHAMA CHA MAPINDUZI HAKINA KIONGOZI NA UONGOZI UNAOWEZA KUKISAIDIA KUIKABILI HII CHANGAMOTO – maandishi tayari yako ukutani!

CCM tukumbuke na tuukubali ukweli huu kuwa: “NI KHERI KUKEMEWA NA KUKOSOLEWA NA WENYE HEKIMA KULIKO KUSIFIWA NA KUTUKUZWA NA WAJINGA NA WAPUMBAVU!”…. kufurahia sifa unazopewa na wajinga ni ujinga uliopitiliza!
Mkala yangu ijayo naangazia tafsiri halisi ya CCM kukataliwa mjini…
Wananchi wengi wa Vijijini Huvutiwa sana "Unyenyekevu"
 unaooneshwa na Viongozi wa CCM wakati wa Kampeni pasipo kuelewa
kuwa haihusiani na Maendeleo. Pichani ni Kiongozi wa CCM
ikiwaomba kura WATOTO vijijini Igunga
(nadhani alikuwa amesahau kuwa WATOTO HUWA HAWAPIGI KURA)!

Sidhani kama kuna Chama hapa Tanzania kinachonufaika na Ujinga wa Watanzania kama CCM!

Wasalaam…. //mussa